Професорката Гордана Сиљановска Давкова, кандидат за претседател на Македонија на ВМРО-ДПМНЕ на митинг на СДСМ во Куманово во недела навечер беше навредена од страна на активист на СДСМ врз основа на пол и возраст, што предизвика лавина од реакции.
Истиот го водеше портпаролката на СДСМ, Богданка Кузеска, која за време на митингот не реагираше за навредите, а како што може да се види на видеото не реагираше ни кандидат за претседател на СДСМ, актуелниот македонски претседател, Стево Пендаровски.
Кузеска реагираше за навредите и истите ги осуди на Фејсбук по завршувањето на митингот, а осуда од тимот на Пендаровски стигна следниот ден.
Осуди пристигнаа и од бројни функционери и членови на ВМРО-ДПМНЕ, а партијата побара и извинување.
Реагираше и Сиљановска Давкова на синоќешниот митинг на ВМРО-ДПМНЕ во Прилеп.
-Ми зборувате за мојата старост, но јас нема да зборувам за вашата младост, ама ќе победам, рече таа и додаде дека во антиката возраста значела и мудрост.
-Се е во ред со мене и физички и психички. И подготвена сум за дебата, ама никако да се согласат за дебата пред одговорни новинари, рече Сиљановска Давкова.
Фото/видео: ВМРО-ДПМНЕ/СДСМ