Во македонското Собрание денеска Борис Кондарко е избран за нов претседател на Државната изборна комисија (ДИК).
Тој доаѓа на позицијата по предлог на опозициската СДСМ, е досегашен член на ДИК, како и поранешен претседател.
За потпретседател на ДИК е избран Абдуш Демири, предлог на владејачката Беса
Членови на ДИК остануваат досегашниот претседател Александар Даштевски од владејачката ВМРО-ДПМНЕ, Дитмире Шеху од опозициската ДУИ и Оливер Ристевски од СДСМ.
За останатите два члена на ДИК, Собранието донесе одлука да се распише оглас.
Нови членови на ДИК ќе се бираат откако досегашниот Бобан Стојановски од ВМРО-ДПМНЕ стана заменик – генерален секретар на Собранието, а Радица Ристеска од СДСМ замина во пензија.
Според Изборниот законик, опозициските партии предлагаат претседател и два члена, а владејачките имаат мнозинство со четворица членови.