За неколку недели треба да профункционира дневна амбуланта за онкологија на ГОБ „8 Септември“, најави министерот за здравство, Арбен Таравари, при денешната посета по повод отворање онколошко одделение и обезбедување терапија за пациентите со малигни заболувања.
„Има решение од Министерство за здравство да можат да се вршат амбулантско-консултативни прегледи и во оваа болница. Целта е дисперзирање на терапијата и растоварување на работата на Клиниката за онкологија,“ рече Таравари.
Директорот на болницата ГОБ „8 Септември“, Синиша Стојаноски појасни дека е изготвен план и динамика за почнување со работа на онколошката амбуланта, каде ќе може да се прима терапија на Одделот за специјалистичко-консултативната онкологија во оваа болница.
„За почеток ќе се трудиме динамиката да одговара на капацитетите, како кадровски, така и функционални на болницата, а постепено како што ќе се зголемува тимот, така ќе расте и бројката на пациенти кои ќе се третираат во оваа установа,“ истакна Стојаноски.