Претседателот на македонското Собранието, Јован Митрески, денеска ги распиша претседателските и парламентарните избори.
Според решенијата што ги потпиша, првиот круг од седмите избори за претседател на Македонија ќе се одржи на 24. април 2024 година (среда), а вториот круг гласање ќе биде после две седмици, односно на 8. мај.
На истиот датум со вториот круг претседателски избори (8. мај) ќе се одржат и 11. парламентарни избори.
Според член 63 од Уставот на Македонија, избори за пратеници во Собранието се одржуваат во последните 90 дена од мандатот на стариот пратенички состав или во рок од 60 дена од денот на распуштање на Собранието.
Членот 81 од Уставот, пак, предвидува дека изборот за претседател на Македонија се врши во последните 60 дена од мандатот на претходниот претседател.
Роковите за спроведување изборните дејствија почнуваат да течат од денот на објавување на Решението за распишување на изборите во „Службен весник“.
Фото: Собрание