Вчера додека се случуваше протестот поради загубата на животот на 22-годишната Фросина Кулакова, уште една сообраќајна несреќа се случи на скопските улици.
Овој пат, настрадал 38-годишен маж, а жената која удрила во него избегала.
„На 31.01.2025 во 17.30 часот во Скопје од страна на полициски службеници од СВР Скопје е пронајдена и лишена од слобода С.В.М. (42), затоа што на 31.01.2025 околу 14 часот на крстосница од бул. „Кузман Јосифоски Питу“ и ул. „Бојмија“ со патничко моторно возило „цитроен“ удрила во пешакот А.М. (38) од Скопје и го напуштила местото на настанот без да укаже помош на повредениот.
А.М. со возило на Итна медицинска помош бил пренесен во Комплекс клиники „Мајка Тереза“ каде му се констатирани телесни повреди.
По наредба на јавен обвинител С.В.М. е задржана во полициска станица и против неа ќе биде поднесена кривична пријава по брза постапка,“ информираа од Министерството за внатрешни работи.
Според информациите на телевизијата Телма, повредениот по укажаната лекарска помош самоиницијативно си заминал од ТОАРИЛУЦ, без да го информира персоналот.