Основното јавно обвинителство (ОЈО) Скопје ги испитува причините за вчерашната несреќа во скопски Карпош во која, по пад на гранка од дрво беше потешко повредено 10-годишно дете.
Од Обвинителството информираат дека во координација на јавен обвинител и екипи на Министерството за внатрешни работи е извршен увид на местото.
Издадени се наредби за обезбедување на целокупната документација за утврдување на староста на дрвото и за евентуалните барања за негово сечење и отстранување, а дополнително, се вршат разговори со лица кои би можеле да имаат сознанија во насока на утврдување на евентуална кривична одговорност за настанот
„Дополнително, се вршат разговори со лица кои би можеле да имаат сознанија во насока на утврдување на евентуална кривична одговорност за настанот“, информираат од Обвинителството.
Несреќата се случи вчера кога 10-годишното дете случајно поминувало во паркот меѓу улиците „Никола Русински“ и „Карпошево востание“ во скопски Карпош. Со потешки телесни повреди, детето е пренесено во Ургентниот центар и сè уште е хоспитализирано и под опсервација.
Од Општина Карпош, вчера информираа за несреќата, и го обвинија Јавното претпријатие „Паркови и зеленило“ оти дотраеното дрво не било отстрането иако подолг период било обележано за сечење.