Од вкупно хоспитализираните 21 повредени во пожарот во Кочани кои се лекуваат во Скопје, денеска ќе бидат пуштени петмина. Четворица се во критична состојба, а кај двајца повторно е влошена состојбата. Се уште има и интубирани повредени во тешка, но не и животно загрижувачка состојба, соопшти денеска министерот за здравство Арбен Таравари.
Надвор од државата се лекуваат 89 повредени, а двајца се враќаат од Литванија и Шведска. Тие најпрво ќе бидат примени и прегледани во домашните болници од каде биле и испратени. Според протоколот ќе бидат задржани 24 часа, а потоа ќе бидат пуштени дома.
Од хоспитализираните, шест се во Клинички центар, шест во Градската болница, пет во ГОБ „8 Септември, а четворица се во приватните клиники.
За во понеделник министерот најави враќање на петмина повредени од странство.
Фото: МЗ