Деновиве со почетна цена за месечен закупот од 240.000 денари или околу 4.000 евра за целиот комплекс, ќе биде објавен оглас за избор на концесионер за „Македонско село“, најави директорот на Службата за општи и заеднички работи при Владата, Ивица Томовски во интервју за 360 степени.
Огласот за комплексот, лоциран на Водно, ќе биде поделен на четири дела, што ќе овозможи различни концесионери да се пријават за различни сегменти од комплексот.
Првиот, вториот и третиот дел ќе опфаќаат по три куќарки, додека четвртиот дел ќе вклучува три ресторани.
Доколку еден економски оператор ги закупи сите четири дела, почетната цена на закупот ќе биде 240.000 денари месечно.
Изборот ќе се врши преку електронско наддавање преку Министерството за финансии, а договорот ќе се склучи на период од 15 години.
Дополнително, ќе биде обезбедена банкарска гаранција како мерка за сигурност дека концесионерот ќе биде сериозен и ќе ги исполни обврските.
Комплексот не функционира од 2019 година.