Под раководство на јавен обвинител од Основното јавно обвинителство за гонење организиран криминал и корупција (ОЈО ГОКК), Министерството за внатрешни работи (МВР) денеска спроведува координирана акција на повеќе локации низ државата.
„Станува збор за основано сомнение за сторени повеќе кривични дела со кои е сторена штета на Фондот за здравствено осигурување.
Со оглед на обемот на акцијата повеќе информации ќе бидат споделени по нејзиното завршување“, велат од ОЈО ГОКК.
Неофицијално, станува збор за злоупотреби при остварување на права на надоместок за помош и нега од друго лице и незаконско стекнување на право на инвалидска пензија.
Со акцијата, како што неофицијално дознаваме, опфатени се неколку десетици осомничени, а станува збор за предмет што ОЈО ГОКК го има работено подолг временски период.
Во предистрагата се користени посебни истражни мерки со кои биле регистрирани директни контакти меѓу осомничените и примање и давање поткуп.