Aвтобусите на Јавното сообраќајно претпријатие „Скопје“ (ЈСП) утре повторно нема да возат зашто вработените сè уште не ги добиле јануарските плати, најави на прес-конференција претседателот на Синдикатот на ЈСП, Миќо Стојановски.
„Денеска е 15., последниот законски ден за исплата на плата. Чекавме до 14.30 часот кога е последниот миг да се префрлат парите во ЈСП и да легнат на сметката на вработените, но тоа не се случи. Не се договоривме така со градоначалничката и со директорот.
Советот на Град Скопје ја заврши својата работа, ја донесе одлуката. Остана сега уште парите да се префрлат и платата да си биде во редовен рок,“ рече Стојановски.
Според одлуката на Синдикатот, од утре од 4.30 часот изутрина автобусите на ЈСП ќе останат во гаражите, а нема да работат ниту билетарниците.