Историски ден за македонската култура и вреднување на нашето заштитено културно богатство, Албанија ѝ врати на Македонија 20 икони.
„Го цениме и вреднуваме овој историски чин на враќање на дваесет икони кои им припаѓаат на македонските цркви и манастири.
Овој гест како израз на пријателството на двете влади е повеќе од политичка порака за почитување на преземените обврски како држави.
Ова е јасен сигнал за етичкиот и моралниот однос, како и вреднување на македонското заштитено културно богатство,“ напиша министерката за култура Бисера Костадиновска Стојчевска на нејзиниот Фејсбук-профил.
Таа информираше дека за овој успешен епилог на 10 годишното патешествие на македонските икони голем придонес имаат и работните групи, од македонска и од албанска страна.
„Им благодарам за професионалниот пристап на стручните лица од областа на заштитата, како и на албанските институции и служби кои ги запленија овие вредни дела.
Иконите ги очекува уште едно патување. Овој пат да се вратат онаму каде што припаѓаат и си тежат,“ додаде таа.
Фото: Министерство за култура