Фрлена бомба на клуб на партијата на Самка Ибраимовски, лицето кое ја фрлило се вратило да провери зошто не експлодирала

Денеска во утринските часови била фрлена бомба кашикара на клубот на Партијата за целосна еманципација на Ромите (ПЦЕР) во Тетово.

Инцидентот е снимен од камерата за видео надзор, а како што информираше денеска претседателот на ПЦЕР, Самка Ибраимовски, снимките покажуваат дека лицето кое ја фрлило бомбата се вратило да провери зошто не експлодирала.

-Во 4:23 часот дошол тука, го скршил стаклото, ја фрлил бомбата. Имал храброст да се врати назад да види дали ја активирал или не. А нашиот активист зел метла, среќа негова што не почнал да мете.

Би било страшна експлозија, се работи за бомба кашикара од постарите што има огромно разорно дејство. Полицијата работи на случајот.

Мислам дека лицето ќе се види кој е како е и зошто е направено ова, изјави Ибраимовски.

При инцидентот е скршено стаклото на клубот.