Тринаесетте припадници на македонската Армија од водот за обезбедување на Главната команда на мисијата „Одлучна поддршка“ во Авганистан се позитивни на коронавирусот и се наоѓаат во изолација.
Уште седуммина припадници на водот, се наведува во денешното соопштение од Министерството за одбрана, се наоѓаат во карантин поради контакт со заразените.
Министерката за одбрана Радмила Шекеринска попладнево разговарала со полковникот Златко Кузманов од главната команда во Кабул, кој ја информирал дека сите наши мировници се во добра општа состојба, без симптоми на болеста и згрижени во соодветни услови.
– Полковникот Кузманов информираше дека во мисијата „Одлучна поддршка“ вирусот бил претходно проширен на околу 2.000 лица, а новиот бран се случил во последните десетина дена. Дека нашите мировници се позитивни на коронавирусот, било откриено на редовните тестирања кои во базата се вршат еднаш неделно, се појаснува во соопштението од МО.
Министерката Шекеринска им посакала побрзо опоравување на припадниците на Армијата и побарала редовно дневно известување за нивната состојба. Таа нагласила дека Министерството за одбрана ќе одговори на каква било потреба или барање во координација со главната команда на мисијата.
Другиот дел од припадниците на Армијата кои во мисијата „Одлучна поддршка“ се ангажирани како штабни офицери во Командата за обука, асистенција и советување – главен град, на аеродромот КАИА, се подвлекува во соопштението, се во добра здравствена состојба и редовно ги извршуваат своите должности.
Фото: МО