Во Општата болница Куманово пред неколку дена почина 32-годишниот Ведат Адеми, по алергиска реакција од аналгетик, по примена инфузија во Хируршкото одделение.
Вчера министерот за здравство, Арбен Таравари го разреши директорот на болницата, Стефан Трајановски, “поради пропусти во лекувањето“, посочувајќи дека од извештајот од Државниот санитарен и здравствен инспекторат многу лесно може да се констатира дека имало предуслови за разрешување на директорот.
Тој потенцира дека тим од Министерството за здравство ќе ја разгледа целата документација по што ќе му ја предаде на Јавното обвинителството, а Судот ќе ја донесе конечната одлука дали постоела лекарска грешка во третманот на пациентот или не.
Семејството на Адеми претходно обвини дека нивниот син починал поради лекарска грешка, бидејќи му била дадена инфузија со лек на кој е алергичен.
Телото на починатиот е предадено на обдукција за да се утврдат причините за смртта.
Новиот директор ќе биде од самата болница.