Министерството за внатрешни работи информираше дека маж на возраст од 66 години загинал во сообраќајка што се случи завчера на патот Велес-Штип.
Во несреќата учествувале „бмв“ со радовишки регистарски ознаки, управувано од А.А. (29) од с.Супурге, радовишко и патничко возило „сузуки“ со светиниколски регистарски ознаки, управувано од В.П. (66) од селото Каратманово, Општина Лозово.
„Во несреќата, од здобиените повреди на местото починал возачот В.П., а смрт констатирал лекар од Итна медицинска помош.
Сопатничката во возилото „сузуки“, Б.П. (60) се здобила со тешки телесни повреди констатирани во комплекс клиники „Мајка Тереза“ во Скопје. Возачот А.А. се здобил со телесни повреди“, информираше МВР.
По извршениот увид, по наредба на јавен обвинител, полициски службеници од ОВР Свети Николе го привеле возачот А.А. за понатамошна постапка.