Под името „Потера“ припадници на македонската и косовската полиција одржаа заедничка вежба на која беше демонстрирано „Спречување на бегство и лишување од слобода на лица сторители на тешки облици на кривични дела”, а се одржа на границата со Косово, во близина на Граничниот премин Јажинце, соопшти МВР.
„Оваа вежбовна активност на повеќе специјализирани полициски единици на двете министерства, се темели на потпишаниот Протокол за заедничка соработка во превенирање на прекуграничниот криминал, и беше замислена како сценарио во кое се детектира присуство на меѓународна криминална група на територијата на Република Северна Македонија, на подрачјето на Секторот за внатрешни работи Тетово, која преку координирано оперативно –тактичко делување беше лоцирана, а сторителите приведени“, информира МВР.
По завршувањето на вежбата, министерот Спасовски и министерот за внатрешни работи на Република Косово Екрем Мустафа го потпишаа Протоколот за соработка меѓу двете министeрства за вршење на гранични проверки на железничкиот сообраќај, а директорите на полиции на двете држави го потпишаа Протоколот во областа на безбедност на поголеми јавни настани.
Фото/Видео: МВР