Косово од 15 март ќе започне со постепено укинување на таксите на производите кои се увезуваат од Србија и Босна и Херцеговина.
Информацијата ја соопшти новиот премиер на Косово, Албин Курти.
„Прво, како знак на добра волја и подготвеност да го решиме економскиот спор со Србија следната недела, на 15 март ќе донесеме одлука да се укинат таксите на суровините што се увезуваат од Србија и Босна и Херцеговина“, изјави Курти на вонредна прес-конференција, пренесуваат регионалните медиуми.
Во исто време, Србија треба да се заложи да ја запре кампањата против признавањето на независноста на Косово и исто така да започне со отстранување на трговските бариери.
„Ако српската страна покаже подготвеност и ги отстрани тарифните бариери, ние до 1 април целосно во рок од 90 дена ќе ја укинеме тарифата“, рече Курти.
Во случај Србија да не се придржува до обврската за отстранување на бариерите и не ја прекине кампањата против независноста на државата, Косово од 1 април ќе започне со спроведување мерки за реципроцитет, прво во областа на трговските односи, најави Курти.
Доколку српската страна не одговори на овие барања, косовската влада на 15 јуни ќе ја врати тарифата од 100%.
Фото: Фејсбук/Курти