Стравувањата дека Ковид-19 може да резултира со пролонгирана здравствена криза преку втор, па дури и трет бран, се остварија како на глобално така и на домашно ниво, соопшти Стопанска банка Скопје преку Македонската берза презентирајќи ги очекувањата за престојниот период.
„Во првиот квартал од годината, домашната економија регистрираше скромен раст од 0,2% на годишно ниво. Растот беше исклучиво воден од финалната потрошувачка, додека инвестициите и извозот забележаа пад.
Високофрекфентните податоци за вториот квартал упатуваат на позначителен пад на економската активност. Во однос на ценовните движења, ниската побарувачка допринесува за умерена инфлација, при што позначаен раст е регистриран единствено кај цените на храната.
Кај платниот биланс се уште нема поголеми нерамнотежи, односно дефицитот на тековната сметка е во рамки на проекциите. Поголем дефицит е регистриран во буџетот на државата и со 30.06.2020 тој изнесува 420.6 милиони евра или 3,7% од БДП.
Ова е резултат на зголемените издатоци заради справување со корона кризата, но и намалените приходи поради пониската профитабилност на приватниот сектор.
Јавниот долг за истиот период достигна 6,527.0 милиони евра или 59,5% од БДП. Зголемената задолженост е главно резултат на седмата еврообврзница од 700 милиони евра (6 години рок на отплата и каматна стапка од 3,675%), како и кредитот од ММФ во износ од 176.5 милиони евра – двете со цел обезбедување на ликвидност заради полесно справување со последиците од здравствената криза.
Како и до сега, банката ќе продолжи да ги превзема сите потребни мерки и активности потребни за минимизирање на негативното влијание од кризата и прилагодување кон новонастанатите макроекономски услови“, велат од банката.
ПОВРЗАНИ ВЕСТИ
Ковид-19 ја скастри добивката на Стопанска банка Скопје