Ранливите категории на граѓани и пензионерите со ниски примања средства од помошта во рамки на четвртиот пакет мерки од државата ќе ги добиваат директно на трансакциски сметки, а не на платежни картички како што беше претходно.
Целта на ваквата одлука, како што информираа на денешната прес-конференција министерот за финансии Фатмир Бесими и директорката на Управата за јавни приходи (УЈП), Сања Лукаревска е да се намалат турканиците на шалтерите, со што ќе се придонесе за грижата за здравјето на овие лица во услови на ковид кризата.
Бесими појасни и дека на овој начин ќе се поедностави начинот на испаќање на средствата од помошта, а воедно ќе се намалат и трошоците кои би биле потребни за изработка и издавање на нови картички.
Финансиската помош ќе изнесува 6.000 денари за ранливите категории на граѓани за кои е веќе изработен законот и е поминат на Влада, а се очекува веќе следниот месец граѓаните да можат да ги користат средствата.