Парламентот во Бугарија вчера со мнозинство гласови го преименува празникот што се чествува на 24. мај, пренесуваат бугарските медиуми.
Тој сега ќе се нарекува „Ден на светите браќа Кирил и Методиј, на бугарската азбука, образование и култура и на словенската литература“, а претходно беше „Ден на бугарското образование и култура и словенска писменост“, пренесува БГНЕС.
Предлогот за преименување на празникот дојде од владејачката партија ВМРО-БНД, на Красимир Каракачанов, а поддршка доби и од коалицискиот партнер, ГЕРБ на премиерот Бојко Борисов.
Против преименувањето била опозициската партија, БСП, од каде посочиле дека овој потег нема за цел да изгради национална самодоверба и патриотизам, туку да го одвлече вниманието на бугарското општество од сегашните проблеми, пренесуваат бугарските медиуми.