Основното јавно обвинителство покрена обвинение за предметот „Лидери“ на поранешно Специјално јавно обвинителство (СЈО) за дивоградбата наспроти Американската амбасада, кој произлезе од разговор помеѓу поранешниот лидер на ВМРО-ДПМНЕ и премиер, Никола Груевски и лидерот на ДУИ, Али Ахмети.
Обвнителството не ги гони нив, туку инвеститорот на градбата.
„По спроведена предистражна и истражна постапка од поранешното Јавно обвинителство за гонење на кривични дела поврзани и кои произлегуваат од содржината на незаконското следење на комуникациите, Основното јавно обвинителство Скопје денеска поднесе Обвинителен акт против едно лице во предметот во јавноста познат како „Лидери“.
Обвинетиот 50-годишник од Скопје се товари за кривично дело – Бесправно градење согласно член 244-а став 1 од Кривичниот законик.
Во периодот од септември 2011 до февруари 2013 година, обвинетиот градел на земјиште во државна сопственост на булеварот „Никола Карев“ во Скопје, за кое во 2004 година имал склучено Договор за закуп и користење на пасишта со ЈП за пасишта – Подружница Бит Пазар – Скопје.
Иако согласно договорот бил корисник на земјиштето за период од 10 години, тој инвестирал во градба на армирано-бетонски објект од втора категорија. Без одобрение за градба тој изградил станбена зграда на два ката со вкупна корисна површина од 1.001 м2, со деловен простор и шест стана„, велат од Обвинителството.