Единствените кои досега се распрашани како сведоци во предистрагата за софтверот на Драги Рашковски се актуелниот и техничкиот министер за внатрешни работи, Оливер Спасовски и Наќе Чулев. Двајцата во различни денови биле на распит и сведочеле во постапката, потврдиле за „Телма“ од Обвинителството за гонење организиран криминал и корупција.
Спасовски бил на распит како сведок во средата, кога давал исказ дека МВР нема потреба за софтверот купен од Рашковски, бидејќи сметала дека користењето на „сејф сити“ системот за сообраќајни прекршоци е спротивен на законската заштита на лични податоци. „Сејф сити“ се користел само при кривични истраги, па поради тоа немало одлука за набавка, ниту потреба од софтверот смислен и купен од ист човек, поранешниот генерален секретар на Владата, Драги Рашковски.
Исказот, Спасовски го давал пред обвинителката Вилма Русковска. Пред Русковска како сведок во четвртокот седнал и екс министерот Наќе Чулев и ги кажал своите сознанија од неговиот мандат, односно дека немал информации за набавката на Рашковски, пренесува Телма.