Опожарена е трска на брегот на Охридското Езеро во пожар што попладнево околу 17 часот се случил на потегот од плажата Версус, кон селото Калишта.
Според првичните проценки на очевидци, изгорена е повеќе од 300 квадратни метри трска во и околу езерото.
Пожарот, како што потврдија за МИА од Територијалната против пожарна единица – Струга целосно е ликвидиран.
„Интервениравме со две противпожарни возила и четворица пожарникари. Пожарот е целосно ликвидиран“, информира ТППЕ – Струга.
Тешкотии при гасењето на пожарот предизвикал ветерот, кој засилено ги ширел огнените јазици.
Причините за настанување допрва ќе се утврдуваат, но според првичните информации се работи за подметнат пожар.
МИА
Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.