Фестивалот на забавна музика „Макфест 2021“ годинава повторно ќе се одржи на отворено, поради здравствените протоколи. Дваесет и шест песни ќе бидат изведени на сцената на Аква бела ресорт на 17 и 18 септември.
Публиката во шоу програмата ќе ја забавуваат „Тумбао салса бенд“, првата вечер, а втората вечер ќе настапат Дац и Александар.
Инаку штипјани синоќа на сцената на Центарот за култура „Ацо Шопов“ уживаа во макфестовските хитови. По повод Денот на независноста од страна на Владата беше подржан проектот „30 хитови од „Макфест“ за 30 години независност. Публиката потпевнуваше на хитовите и победничките песни на „Макфест“, кои се испеани во изминатите 35 години.
Хитовите се пееја во живо, а настапија Ристо Самарџиев, Димитар Андоновски, Александра Јанева, Ѓоко Таневски, Наде Тружба…
МИА