Агенцијата за лекови и медицински средства согласно своите стратешки цели, а во насока на заштита и унапредување на јавното здравје информира дека будно ја следи употребата на антибактериските лекови за системска употреба (антибиотици).
Посочуваат дека од почетокот на пандемијата со Ковид-19 евидентирана е зголемена потрошувачката на антибиотиците.
Во интерес на јавното здравје и безбедната употреба на лековите од Агенцијата ги потсетуваат здравствените работници на насоките за рационално користење на антибиотици, нивна употреба согласно индикационото подрачје како и издавање на антибиотиците во аптеките исклучиво на лекарски рецепт (согласно одредбите утврдени во Законот).
– Антибиотиците се индицирани за третман на бактериска инфекција, но не и вирусна. Апелираме до граѓаните да не користат антибиотици за превенција и третман на корона вирусот Ковид-19 на своја рака, по свое лично убедување и без претходна консултација со лекар или фармацевт, посочуваат од Агенцијата за лекови и медицински средствa.