На 73-годишна возраст по долга и тешка битка со рак на дојката, почина австралиската пејачка Оливија Њутн-Џон.
Таа почина вчера во својот дом во Јужна Калифорнија, а тажната вест ја потврди нејзиниот сопруг Џон Истерлинг.
„Оливија Њутн-Џон (73) почина мирно утрово на својот ранч во Јужна Калифорнија, опкружена со семејството и пријателите. Бараме сите да ја почитуваат приватноста на семејството во овој многу тежок период.
Оливија беше симбол на триумфот и надежта повеќе од 30 години, споделувајќи го своето патување во борбата против ракот на дојката. Нејзината исцелителна инспирација и пионерско искуство со хербалната медицина продолжува со Фондацијата Оливија Њутн-Џон, посветена на хербалната медицина и истражувањето на ракот“, напиша Истерлинг на својот Фејсбук профил.
Оливија Њутн-Џон ќе ја паметиме по улогата во култниот филм “Брилијантин„, како и бројните хитови.
Фото: Промо/Брилијантин