Се проширува и уредува патеката за планински велосипедизам во Дојран долж фронтовската линија од Првата светска војна.
Информацијата ја сподели градоначалникот, Анго Ангов, кој напиша на Фејсбук дека проектот за овој зафат е финансиран од Центарот за развој на Југоисточниот плански регион, а сега се врши машинско израмнување на постојната траса со проширување на одредени места и со пробивање нова траса.
– Благодарение на овој проект во Општина Дојран, освен класичниот езерски туризам, ќе се развиваат и алтернативни форми на туризмот како што е off road велосипедизмот, за што ние како општина особено се залагаме.
Со оваа инвестиција ќе имаме зголемен број на активности, ќе се организираат рекреативни тури, како и спортски натпревари кои во иднина ќе придонесат голем број на вљубеници на велосипедизмот да се приближат кон природата, да рекреираат, но и подобро да ги запознаат природните убавини и богатата историја која ја нуди нашиот Дојран, објави Ангов.
Патеката е во должина од 16 километри. Ќе бидат набавени соодветни патоказни знаци за насочување низ трасата, а ќе бидат подигнати летниковци, дрвени клупи, канти за отпадоци, како и друга опрема која е планирано да се постави долж велосипедската патека.
Фото: Општина Дојран