Државната комисија за спречување корупција (ДКСК) соопшти дека од неуспешната конфискација на имотот на „Трансмет“ за случајот “Труст“, најмногу ќарила фирмата „Пуцко петрол“.
Од таму соопштија дека имотот на „Трансмет“ бил преземен од фирми и банки со што била направена штета од над 12 милиони евра за државата.
Според ДКСК, постоела шема со која се обезвреднил имотот, а во истата биле вклучени нотари, обвинители, правобранителството, проценители и приватни фирми.
Од шемата според ДКСК најмногу ќарил “Пуцко Петрол“, над 4 милиони евра, а движниот имот најверојатно е користен во правење профит за фирми семејно поврзани со осудениот во случајот „Труст“, Сеад Кочан.
ДКСК најде слабости уште во почетокот на процесот во предметот „Труст“ во Специјалното јавно обвинителство (СЈО), односно дека дел од имотот стекнат со кривични дела бил користен како гаранција за да не му биде определен притвор на сопственикот на „Трансмет“, Сеад Кочан.
„Мрежата била сплетена со голем број учесници со што навистина се овозможило со имот кој потекнува од кривично дело да се изнуди гаранција за човек да се суди од слобода.
И да се направи цела конструкција за РСМ да не може да го конфискува имотот, нормално, тука има помош од ‘Пуцко петрол’, проценители, извршители. Како може ист проценител да биде и од страна на осудениот и од СЈО, како може толку да се потцени имотот“, изјави претседателката на ДКСК, Билјана Ивановска.
ПОВРЗАНИ ВЕСТИ
ЕДС, Пуцко петрол и Марковски Компани Борче лани склучиле највредни договори за јавни набавки
Уставен ја “замрзна“ изградбата на бензиската на „Пуцко петрол“ во скопски Карпош
Стечај за „Трансмет“ на Сеад Кочан, еден од ретките кој заврши во затвор по обвинение од СЈО
Фото: МИА