Ќе има ревизија на договорот за изградба на автопатската делница од Охрид до Кичево, а истата денеска ја најави премиерот Димитар Ковачевски.
-Ќе побарам ревизија на овој проект, и со оглед на тоа што проектот од низа на причини не е завршен десет години, сметам дека треба да се размислува и во насока на раскинување на договорот и барање изведувач што ќе го изгради на квалитетен начин, а не да гледаме десет години да се прави пат, да се инвестираат пари, а да нема досега пуштен ниту еден метар од автопатот, рече Ковачевски, кој подвлече дека од тоа што ќе покаже ревизијата ќе се одлучи каква одлука да се донесе.
Изградбата на овој автопат почна во февруари 2014 година. Неговата изградба тогаш вредеше 374 милиони евра, а денеска е 598 милиони евра.
Истиот е дел од Коридорот 8, со вкупна должина од 57 километри.
Фото: Влада