Измените на Кривичниот законик пречка за борбата против корупцијата во Македонија, земјата рангирана на 76. место на листата на „Транспаренси интернешнл“

На најновата ранг-листа за Глобалниот индекс за перцепција на корупцијата за 2023 година на „Транспаренси интернешнл“, Македонија е рангирана на 76. место од вкупно 180 земји, со скок од девет позиции во однос на 2022 година и напредок од два индексни поена.

Македонија 76. место го дели со Молдавија, Унгарија, Куба, Кина, Бахраин и Тринидад и Тобаго.

Во извештајот на „Транспаренси интернешнл“ за Македонија меѓудругото се наведува дека “недемократските измени на Кривичниот законик“ се сериозна пречка за борба против корупцијата во земјата и дека поради истите е нарушен правосудниот систем.

Дополнителна загриженост има во однос на способноста на правосудството за ефикасна борба против корупцијата поради “политички мотивираните назначувања и разрешувања на судски функционери“.

Во регионов, Косово е рангирано на 83. место, Албанија на 98., Србија на 104. место, Босна и Херцеговина на 108. место, Грција на 59. место, Хрватска на 57. место, Црна Гора на 63. и Бугарија на 67. место.

Најдобро рангирана земја во светот е Данска, која на оваа позиција е од 2018 година, а на дното е Сомалија.