Невремето со пороен дожд и ветер што вчера попладне го зафати Светиниколскиот и Неготинскиот регион направило штета на надвозникот кај селото Кадрифаково, информираа од Центарот за управување со кризи (ЦУК).
„Од поројниот дожд и големата количина на вода што надојде беше поплавен надвозникот кај селото Кадрифаково, при што на регионалниот пат Штип-Свети Николе има насобрано големо количество гранки, ѓубре, наноси од кал и песок.
Има оштетување на патот од поројната вода, при што имаше направена дупка,“ велат од таму.
Добиена е и пријава за гром, кој удрил во куќа во Неготино, по што на улицата „Пано Калајџиски“ и околината имало прекин на електрична енергија, а предизвикани се и штети на апарати во домаќинствата како последица од громот.
Фото: ЦУК