Пожарот во прилепско Мариово е најголем, најкомплициран и најтежок за гаснење, оцени директорот на Центарот за управување со кризи (ЦУК), Стојанче Ангелов.
Ситуацијата е критична, бидејќи е зафатена површина од околу 16.000 хектари, а периметарот на огнената линија изнесува 110 километри.
На овој пожар утрово биле упатени 100 припадници на Армијата, 25 припадници на специјалната полициска едница „Тигар“, триесетина вработени во „Национални шуми“, како и два тима на Дирекцијата за заштита и спасување со повеќе од 25 лица.
Во гаснењето на пожарот помогнал и еден „ер-трактор“ на Дирекцијата за заштита и спасување, додека останатите два, биле неисправни и не се во состојба да летаат. Истото се случува и со полициските хеликоптери.
„Оптимисти сме дека во текот на утрешниот ден големиот полициски хеликоптер ќе биде функционален и ќе можеме да го користиме. Има најави од УХМР за можен дожд на територијата на Мариово и прилепската околина, но засега овие прогнози не се остваруваат,“ вели Ангелов.
Фото: ЦУК