ГОБ „8 Септември“ Скопје ќе стане регионален центар, нов Клинички нема да има затоа што населението старее, рече директорот на Фондот за здравствено осигурување, Сашо Клековски, презентирајќи го овогодишниот буџет на фондот „План 2025“.
„Нам демографијата ни паѓа, со текот на годините имаме сѐ помалку население, така што мораме да ги погледнеме и бројките на осигуреници и на пациенти.
Второ, дел од капацитетите не се искористени како што треба. Од сите постоечки капацитети во Македонија, најблиску до стандарди за нешто повеќе, вклучувајќи и за универзитетска клиника, има „8 Септември“,“ рече Клековски.
Тој потенцираше дека во оваа болница се изведуваат методи кои не се изведуваат на клиниките.
„Тука гледаме најмногу потенцијал, со најмало вложување да добиеме најдобар одговор. Освен Онкологијата, мислам дека ќе бидат најавени нови проекти, како на пример Нефрологија,“ рече Клековски додавајќи дека за оваа идеја се потребни законски измени.