Петрит Зифле, 63-годишен албански државјанин, имигрант на островот Крф во Грција, е убиен од 44-годишен националист од Златна Зора по расправија за етнички прашања и за името на Македонија во кафеана, пренесуваат албанските медиуми.
Според нив Зифле се вмешал во гласното дебатирање на соседната маса, на која при аргументирањето за Македонија биле клеветени и расно навредувани сите што не се Грци.
Тој возвратил, при што дошло до кошкање, за на крајот да бидат разделени, а жртвата си заминала од локалот испратена со пцости и закани од неговиот убиец.
Подоцна членот на Златна зора му направил заседа на Зифле, го убил со ловџиска пушка и телото го фрлил во ендек покрај локалниот пат меѓу Драготина и Спартера, три километри од Лефкими, каде што се случило убиството. Таму и е најден трупот следното утро од локален жител што поминувал со автомобил.