Нема никакви поместувања во однос на разликите меѓу власта и опозицијата околу Законот за јавно обвинителство, изјави денеска министерката за правда Рената Дескоска, по завршувањето на новата рунда разговори за клучните прашања од реформата на правосудството.
-За Министерството за правда не е прифатливо внесување на одредба во законот што ќе значи скриена амнестија, рече Дескоска од хотелот „Мериот“, каде треба да се оддржи конференција за борба против корупцијата.
Главните разлики се идниот статус и функционирање на Специјалното јавно обвинителство (СЈО), судбината на постапките кои веќе се почнати и употребата на доказите, односно двете страни најмногу спорат за членот 105 од законот што го регулира продолжувањето на постапките и судбината на доказите од прислушкуваните разговори.
Договорот за овој закон е еден од условите за добивање позитивен извештај на Европската комисија.
Следната средба на работните групи е закажана за в петок.
МИА