Рочиштата за предметите на Специјалното јавно обвинителство (СЈО), „Транспортер“ и „Траекторија“ денеска беа одложени на барање на Основното јавно обвинителство и на СЈО.
Во „Траекторија“ обвинети се поранешниот премиер, Никола Груевски, поранешниот вицепремиер за економски прашања, Владимир Пешевски, поранешен министер за транспорт и врски, Миле Јанакиески и поранешниот директор на Агенцијата за државни патишта, Љупчо Георгиевски.
Според обвинението на СЈО, обвинетите во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатиштата Миладиновци-Штип и Кичево-Охрид ги искористиле и пречекориле своите овластувања. Со тоа му нанеле штета на Буџетот од најмалку 155 милиони евра.
Во предметот „Транспортер“ обвинети се поранешниот битолски градоначалник, Владимир Талески и уште 20-тина лица за злоупотреба на службената положба во врска со организирањето превоз на ученици во Битола, со што е направена проневера на околу 360.000 евра.