Белгиските власти денеска одлучија да го забранат влезот во земјата за патниците од Индија, Бразил и Јужна Африка, со цел да се запре ширењето на новите видови на коронавирусот.
– Транспортот на патници со авион, воз, брод и автобус, вклучувајќи го и транзитот, од Индија, Бразил и Јужна Африка до Белгија ќе биде забранет, изјави белгискиот премиер.
Како што се додава, министерот за внатрешни работи што е можно поскоро ќе го објави указот за забраната за доаѓање.
Белгијците кои живеат во овие три земји можат да се вратат во земјата, но ќе мора да бидат тестирани и ставени во карантин.
Забраната не се однесува на одредени професии, што се поврзани со транспортот, морнарите, дипломати или членови на меѓународни организации.
„Федералната влада внимателно го следи развојот на епидемиолошката состојба. Планирани се натамошни консултации на ниво на ЕУ, особено со соседните земји, со цел да се постигне координиран пристап”, се додава во соопштението.
Според здравствените власти, во Белгија во моментов наjраспространет е британскиот вид на коронавирусот (86 проценти), а по него следи бразилскиот (4,9 проценти) и јужноафриканскиот (3,7 проценти).
МИА/Фото: Photo by François Genon on Unsplash