Бензините поскапуваат, а дизелот поевтинува за половина денар

Бензините „еуросупер БС-95“ и „еуросупер БС-98“ од ноќеска на полноќ поскапуваат за половина денар, а за толку поевтинуваат дизелот и екстра лесното масло за домаќинство (ЕЛ-1), одлучи на денешната седница Регулаторната комисија за енергетика (РКЕ).

Новата цена на „еуросупер БС-95“ ќе изнесува 77 денари, литар „еуросупер БС-98“ ќе се продава по 79 денари. За литар дизел ќе се плаќа по 68 денари, како и 67,5 денари за екстра-лесното масло.

Во изминатиот седумдневен период референтните цени на светските берзи во просек бележат зголемување кај бензинот за 1,292 проценти, кај дизелот има намалување за 0,461 проценти, кај екстра лесното масло намалувањето е за 0,817 проценти и кај мазутот намалувањето е за 0,838 проценти.

Во истиот период курсот на денарот во однос на доларот е повисок за 0,103 проценти, информира РКЕ во одлуката за промена на цените на горивата.