Од попладне се очекуваат врнежи на цела територија на државата, а особено поинтензивни ќе бидат во западните делови каде ќе наврнат нови 30 литри на метар квадратен. На планините во северозападниот дел од државата ќе врне снег.
Управата за хидрометеоролошки работи (УХМР) соопшти дека до изутринава во западните делови количествата на врнежи изнесуваат 20 литри на метар квадратен и дека почвата е веќе натопена од дождот.
Од утре до понеделник ќе преовладува врнежливо време. Повремено во западните делови врнежите ќе бидат поројни и пообилни. На планините во северозападниот и западниот дел ќе врне снег и значително ќе се зголеми снежната покривка.
Во вечерните часови во сабота кон недела и преку ноќ во недела, врнежите повремено ќе преминуваат во снег на некои повисоки места, особено во северниот дел од земјава.
Целиот овој период се најавува јужно струење што значи дека температурите ќе бидат над нулата.