Нема индикации дека синоќешниот инцидент во Полска бил намерен, ниту дека Русија подготвува воен напад врз НАТО, изјави генералниот секретар Јенс Столтенберг на прес-конференција по вонредниот состанок на Северноатлантскиот совет.
„Истрагата за случајот продолжува и треба да ги почекаме резултатите. Прелиминарната проценка покажува дека инцидентот најверојатно се должи на тоа дека украинската воздушна одбрана дејствувала против руските ракетни напади“, рече Столтенберг.
„Украина не е виновна, Русија сноси целосна одговорност за продолжувањето на војната“, додаде генералниот секретар.
Тој истакна дека синоќешниот инцидент се случил на денот на масовните руски воздушни напади врз Украина.
„Русија мора да ја прекине оваа бесмислена војна“, рече Столтенберг.
Тој информира дека разговарал со претседателите на САД и на Полска, Џо Бајден и Анджеј Дуда и констатирале дека е неопходно да се остане смирен.
„Секогаш сме подготвени да го направиме она што е неопходно за да го заштитиме секој сојузник“, рече Столтенберг.
ПОВРЗАНИ ВЕСТИ
Москва: Ги идентификувавме остатоците од ракетите во Полска, станува збор за украинските С-300
(Видео+Фото) Проектил падна во Полска, медиуми тврдат дека е руски, две лица загинаа
МИА/Фото: НАТО