Граѓаните на Скопје не можат да избегаат од градскиот метеж и бучава ниту во Градскиот парк, бидејќи уличките наменети за движење на рекреативците се претворени во сообраќајници низ кои постојано минуваат автомобили и мотори.
Доволно е човек да помине само неколку часа во паркот за да добие впечаток дека се наоѓа пред некоја прометна сообраќајна крстосница, за што се доказ и фотографиите кои се направени во текот на еден ден.
Несовесните возачи го користат паркот за да скратат на време и да избегнат семафори и чекање и не се премногу загрижени што со тоа го нарушуваат мирот и ја загрозуваат безбедноста на малолетни дечиња, нивните родители и сите граѓани кои сакаат да се одморат или да рекреираат во паркот.
Прашање е колку МВР и градските власти ќе го чујат крикот на граѓаните и дали ќе најдат начин со зачестени патроли, рампи и соодветна сигнализација да го решат овој проблем и да стават крај на движењето на моторни возила во Градскиот парк.