Вкупните кредити во јули остварија нагорна месечна промена од 0,4% која во целост произлегува од зголеменото кредитирање на секторот „домаќинства“, во услови на намалено кредитирање на корпоративниот сектор, соопшти Народната банка.
На годишно ниво, растот на кредитите изнесува 6,2% и во поголем дел (76,3%) е резултат на кредитирањето на секторот „домаќинства“.
Кредитите на корпоративниот сектор забележаа скромен месечен пад од 0,4% во текот на јули. Во услови на раст на кредитите во странска валута, месечната промена во целост се објаснува со намаленото кредитирање на корпоративниот сектор во денари.
„На годишна основа, бележиме раст на кредитната активност од 2,7% која се должи на зголеменото кредитирање во денари, во услови на намалено кредитирање во странска валута“, соопшти НБРМ.
Вкупните кредити на домаќинствата во јули остварија месечен и годишен раст од 1,1% и 10,0%, соодветно.
Притоа, месечниот и годишен раст на кредитирањето на домаќинствата во поголем дел се должи на кредитите одобрени во денари (учество во растот од 67,3% и 61,8%, соодветно).