И поранешниот премиер и лидер на СДСМ, Зоран Заев е дел од стратешкиот тим на владејачката партија.
Актуелниот лидер и премиер Димитар Ковачевски објави фотографии од синоќешниот состанок на тимот, а дел од медиумите тоа го толкуваат како покажување сплотеност на партијата.
“СДСМ има долгогодишно државничко и партиско искуство, посветеност и полна енергија да продолжи со победа и брз чекор по европскиот пат.
Денешниот координативен состанок на стратешкиот тим е во оваа насока – да направиме сè, да овозможиме целосен државен и национален консензус за исполнување на определбата на огромното мнозинство граѓани, да станеме полноправна европска држава до 2030 година.
Европскиот пат и полноправното членство во ЕУ е највисок државен и национален, македонски приоритет. Ова е клучен момент, се работи за сегашноста, стабилноста и извесната иднина на сите наши граѓани, за иднината на денешните и идните генерации.
Граѓаните заслужуваат европски квалитет на живот и европски животен стандард, во европска држава, а тоа да биде нивната родна земја, нивната татковина“, напиша Ковачевски на Фејсбук.
Фото: Ковачевски/Фејсбук