Владата денеска на седница ја разгледа и усвои информацијата за исплата на пензии за ноември 2020 година, и го задолжи Фондот на пензиското и инвалидското осигурување најдоцна до утре да ги достави податоците за пензиите до деловните банки.
На деловните банки Владата им препорача да обезбедат пензионерите од 26 ноември да може да располагаат со ноемвриските пензии преку мрежата на банкомати и во трговската мрежа.
-Деловните банки преку филијалите и експозитурите на банките ќе обезбедат готовинска исплата на пензии за клиентите кои не користат картички, во четири групи според следниот распоред составен според висината на пензијата: за пензии со висина до 11.000 денари, исплата да се изврши на 26 ноември – четврток, за пензии со висина 11.001-14.000 денари, исплата да се изврши на 27 ноември – петок, за пензии со висина 14.001-18.000 денари, исплата да се изврши на 30 ноември – понеделник, и за пензии со висина над 18.001 денари, исплата да се изврши на 1 декември – вторник, соопшти Владата.