Извозот во првите седум месеци зголемен за 19,4, а увозот за 26,9%

Во првите седум месеци од годинава од државава се извезени стоки во вкупа вредност од 4.767.002.000 евра, што претставува пораст од 19,3 проценти во однос на истиот период од претходната година.

Вредноста на увeзената стока, во истиот период, изнесува 6.912.713.000 евра, што е за 26,9 проценти повеќе во споредба со истиот период од претходната година, објави денеска Државниот завод за статистика.

Трговскиот дефицит, во периодот јануари-јули годинава изнесува 2.145.711.000 евра.

Трговската размена по производи покажува дека во извозот е најголемо учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, фероникелот и деловите на седишта од подгрупата 821.1.

Во увозот, пак, се најмногу застапени нафтените масла и маслата добиени од битуменозни минерали (освен сурови), другите метали од платинската група и нивни легури, необработени или во облик на прав, електричната енергија и благородни метали во колоидна состојба; соединенија, органски или неоргански, од благородни метали, хемиски дефинирани или недефинирани; амалгами од благородни метали.

Во периодот јануари-јули годинава, според вкупниот обем на надворешнотрговската размена, најмногу сме тргувале со Германија, Велика Британија, Грција, Србија и Бугарија.