Синоќа на националната грчка телевизија ЕРТ се одржа првата предизборна дебата во Грција по осум години.
На истата, како што јавува дописникот на еМагазин од Солун, учествуваа актуелниот премиер и лидер на Нова демократија, Кирјакос Мицотакис, претседателот на СИРИЗА, Алексис Ципрас, првиот човек на ПАСОК- Движење на промена, Никос Андрулакис, генералните секретари на Комунистичката партија и МЕРА 25, Димитрис Куцубас и Јанис Варуфакис и лидерот на Грчко решение, Кирјакос Велопулос.
Претходно Мицотакис одби да се соочи со Ципрас, но се согласи да биде дел од некој чуден концепт на политичка дебата, во која лидерите не дебатираа меѓусебно, туку група новинари од повеќе приватни телевизии (најголемиот дел од нив отворено провладини) им поставуваа прашања.
И Македонија беше една од темите. Имено лидерот на Грчко решение, партија која е дел од актуелниот грчки Парламент покажувајќи слики со поранешниот премиер на Македонија, Зоран Заев со Ципрас и Мицотакис, најави дека ако победи ќе го поништи Договорот од Преспа.
Фото: Скај ТВ/ЕРТ