Хрватските власти објавија дека возачот на автобусот, кој излета од автопат во Хрватска, кај Славонски Брод, е уапсен, пишува „Дневник.хр“.
Според последните информации во сообраќајката загинаа 10 патници, а 44 се тешко или полесно повредени.
Возачот бил уапсен под сомнеж дека го возел автобусот непрописно, а потоа излетал од патот. Причините за излетувањето не се познати, но тој изјавил дека накратко заспал.
Местото на несреќата го посетил и Дамир Трут, помошник министер за внатрешни работи.
„Во автобусот имаше 67 патници и двајца возачи. Девет патници и еден возач загинаа. 44 патници се примени во болницата во Славонски Брод, каде што им е пружена лекарска помош. Осум од нив се потешко повредени, а до сега четворица се оперирани,“ изјави Трут.
Неповредените патници биле во полициска станица на испрашување.
Министерот за здравство, Вили Берош изјави дека во автобусот имало 15 малолетници, а едно девојче е потешко повредено.
„Од 15 деца три се на операција, можно е некои од нив да добијат дијагноза тешки телесни повреди,“ изјави Берош.
На неповредените им е обезбедено сместување, храна и се што им е потребно.
ПОВРЗАНИ ВЕСТИ
Фото/видео: Večernji list