Раководителот на подрачната единица на Министерство за земјоделство, шумарство и водостопанство (МЗШВ) во Берово, Гоце Милошевски подготвува кривична пријава за дополнителниот заменик-министер Цветан Трипуновски за неовластено снимање, пренесува „ТВ24“.
Тој се одлучил да ја бара правдата по судска постапка, бидејќи неговиот сегашен шеф Трипуносвки извршил грубо кршење на приватноста.
„Лично сметам дека со ваквиот пристап и начин на неовластено снимање и пренесување во медимуите има грубо кршење на нашата приватност. Јас сум уште потресен од вчерашниот настан, не знам која била целта со која намена направено. Ако сакаше да се грижи за земјоделците требаше да седне и да разговараме, проблемите постојат со години наназад, а со ваквиот начин и пристап нема да решиме ништо“, вели Милошевски.
Трипуновски ненајавено упадна во просториите на подрачната единица на МЗШВ во Берово и ги снимаше вработените на своите работни места, за да провери како и дали работат.
Дел од вработените се вознемирија пред камерата, а раководителот веднаш реагираше на снимањето.
ПОВРЗАНИ ВЕСТИ
Трипуновски: Не сум вршел мобинг, бидете подготвени на многу вакви контроли
Фото: ВМРО-ДПМНЕ