Професорката и актерка Синоличка Трпкова честопати на нејзиниот Фејсбук-профил пишува за општествени појави и случувања кои ги засегаат граѓаните. Нејзиното мислење е високо почитувано, имајќи го предвид сиот животен и професионален „багаж“ кој го има зад себе.
Овој пат Трпкова се произнесе за прашањето за македонскиот јазик, кој посебно се актуелизираше во односите со Бугарија.
„Јазикот не е вонбрачно дете за кое треба да се докажува татковство со дебати, изјави, симпозиуми, дискусии. Јазикот не е догма, ниту бара прослави, чествувања, јубилеи и рецитали. Тој не е само тема за експерти. Јазикот мора да живее, да расне, да се менува и усовршува преку неговата секојдневна употреба.
Мора да се се знае разликата меѓу литературниот и говорниот јазик! Писменоста, артикулираноста, но и звучноста и мелодијата треба да се негува од сите нас, заедно – пред се’, од медиумите, како главни алатки за информација, забава, учење.
Медиумската јазична култура го ткае јазичниот идентитет. Јавниот говор и обраќањата на политичарите, академиците, уметниците, новинарите ја одржуваат жилавоста, спецификата и убавината на јазикот. Медиумите и образованието се неговите столбови.
Без државна стратегија за негување на јазикот како приоритет, и како најголемо културно наследство, може само да се тргува со придавки, додавки, запирки. Веројатно тоа е нашиот капацитет. Кралот на музиката одамна рекол – „Има некои луѓе кои ако не знаат, не можеш ни да им кажеш“,“ напиша таа на Фејсбук.
Фото: Фејсбук/Трпкова