Србите од денеска ќе добиваат електронски картички за бесплатни патарини низ Македонија

Државјаните на Србија, од денеска на граница ќе добиваат електронски картички (М-Смарт Кард) за ослободување од надомест за патарини. Одлуката која Владата ја донесе на седница одржана на 25 мај, ќе важи од денеска до 15 август.

Врз основа на оваа одлука, набавени се 200.000 М- Смарт Кард, во износ од 172.000.000 денари (2,8 милиони евра).

„Се задолжува Јавното претпријатие за државни патишта, откако ќе заврши проектот, во случај на неискористени средства, истите да ги врати на сметката на буџетот.

Министерството за внатрешни работи е задолжено за распределба на електронските картички на возилата со српски туристи кои ќе влегуваат на територијата на Северна Македонија преку Граничниот премин Табановце,“ се вели во одлуката на Влада од 25 мај.

Оваа мерка е со цел Владата да возрати на Србија за хуманиот гест и помошта во вакцини.

Фото: Влада